Málfrelsi, tjáningafrelsi og trúfrelsi

Þetta er skondin umræða. Mikið er talað um að þetta sé eldfimt dæmi, pólitíkusar vilja illa taka afstöðu, og þeir sem gera slíkt eru oftar en ekki bombardaðir á spjallforritum og miðlum þjóðarinnar.

 

Tökum þetta í aðeins annað form. Sama umræða, en nálgunin gerð frá öðru málefni. Fólk af lituðu hörundi. Svertingjar.

 "Það að vera svertingi er dauðasynd og þeir eru allir bankaræningjar" Hefði þetta verið skoðun hans væri þessi umræða ekki til staðar, fólk hefði orðið brjálað yfir því hvurslags dónaskapur væri í manninum og svona fordómar væru ekki liðnir innan skólans eða utan.

En hann vitnaði í biblíuna. Þar er allt sem er skrifað heilagur sannleikur, og þar af leiðandi getur hann ekki verið að segja eitthvað rangt.

 Ég held að fólk ætti að átta sig á því að fordómar hjá fólki í ábyrgðarstöðu innan samfélagsins, þá sérstaklega í kringum unga meðlimi samfélagsins, endar ekki þegar vinnutími þeirra endar. Ég vinn sem þjálfari, ég verð að passa mig á því hvað fer inná vegginn á fésbókinni, þar sem nemendur geta séð það. Ég þarf að passa mig á því að það sem ég geri utan veggja salarins (þar sem þjálfunin fer fram) geti ekki verið miðlað til nemenda. Ég hef fullt af skoðunum um mörg málefni, en mörg þeirra eiga ekki heima þar sem allir geta séð. Snorri virðist hafa þau mörk nokkuð óskýr.

Ég ræði persónulegar skoðanir mínar um viðkvæm málefni (til dæmis samkynhneigð) við vini og vandamenn, en það er gert þar sem það er ekki hent upp fyrir allra manna augum. 

Mig langar að minna að tilveru réttur samkynhneigðra einstaklinga er tryggður í stjórnarskrá okkar, líkt og kristintrú. Það að ýta undir að annað þeirra sé dauðasynd er svæsin árás á friðhelgi þeirra.

Snorri á samt rétt á þessum skoðunum, því neita ég ekki. En á hann rétt á að hrópa þeim út svona? Þetta er líkt og hugtakið sannleikur. Þú labbar upp á manneskju sem þjáist af rosalegri yfirvigt. Þín fyrstu orð við þessa manneskju eru "veistu það þú ert svo ógeðslega feit að mér býður við þér. Afhverju hoppar þú ekki fram af björg, ógeðið þitt?" Og svo þegar manneskjan bregst hin versta við, þá kemur upp þessi setning "Hvað er að ykkur? Ég á rétt á að segja sannleikann"

Þetta er ekki sannleikur, þetta er óþarfa skítkast þótt það sé skoðun einstaklingsins.

Virðum hvort annað, höldum meinyrða staðhæfingum fyrir okkur sjálfum, það skilar sér í betra samfélagi.

Ef ég lendi í helvíti rotna ég þar glaður

Æðislegur árangur, á versta stað.

Mikilvægasti þáttur í samfélagi er nýliðun inní samfélagið. Gæði nýju einstaklinganna er jafnframt viðmiðið sem sú kynslóð gefur samfélaginu og skilur eftir sig fyrir komandi kynslóð.

 Ef það er eitthvað sem skiptir máli hjá okkur sem fullorðin erum, þá er það, það að við sjáum okkar börn og barnabörn (og lengra) dafna og fá að gera og upplifa meira og betra en við gerðum. Fáir njóta eldanna er fyrstir tendra þá, stendur einhversstaðar skrifað.

Skóli og ungliðastarf er mjög mikilvægt almennt, nauðsynlegt á tímum fjárþurrðar og/eða kreppu. Að skera niður um 800 starfsmenn í leikskólum og rúmlega 260 manns í grunnskólum getur ekki annað gert en að koma niður á kennslu og/eða menntun þeirra sem eru í því stigi samfélagsins.

 Næsta spurning er, sú hvort þetta sé raunverulegur sparnaður.

Hversu margir af þessum þúsund einstaklingum (ef ég man töluna rétt) fóru á atvinnuleysisbætur, og þar af leiðandi skiluðu ekki vinnu á móti þeim tekjum sem ríkissjóður þarf að punga út. Er þetta kostnaður sem var þess virði, að borga 2.5 milljarða á ári meira í menntakerfið í formi launakosnaðar, eða borga álíka tölu (að öllum líkindum lægri en 2.5 en samt) í launakosnað með engri vinnu á móti gjaldinu. Plús það að þessir einstaklingar eru þar af leiðandi að eyða minna og veltan á gjaldeyrinum er hægari en ella.

 

Ekki ætla ég að dæma um það hvort þetta sé gott/slæmt, rétt/rangt. Ég er ekki með menntunina í það. En þetta vekur samt upp nokkrar spurningar.

 

Kveðja,

 

Sindri.

Lækkuðu kostnað við skólana

Ávana og fíkniefni og verðtryggingin.

Ég finn mig knúinn til að skrifa smá um þetta mál.

 Bandormurinn eins og ég skil hann er í raun ekkert annað en myndlíking á keðjuverkuninni sem myndast þegar hækkanir eiga sér stað innan liða sem eru í verðtryggingar kerfinu sem við höfum hérna á klakanum.

Upphaflega var þetta ætlað að stýra því að launavísitalan og íbúðarlán héldust í hendur (sem var fínasta hugmynd) Seinna var svo ákveðið að setja allt annað inní þessa vísitölu og kalla þetta verðtryggingu.

Sem gerir það að verkum að ef að það er skortur á hveiti, og verð á normal brauði hækkar í bakaríinu, þá hækkar lánið þitt, þótt þú sért með hveiti ofnæmi og kemur ekki nálægt bakaríum.  Ákveði eitthvert land að ráðast inní land sem framleiðir olíu og verð á bensíni hækkar, þá hækkar lánið þitt, þótt þú eigir ekki bíl, heldur gengur/hjólar allt innanbæjar. Ef ríkið hækkar skatt á nauðsynjavörum (bleyjur, tannkrem og svo framvegis) þá hækkar lánið þitt, þótt þú eigir ekki börn og sért tannlaus. 

Það sorglegasta við þetta allt saman er að þar sem það er ásetningur ríkisins að hækka álögur á tóbaki og áfengi, til að vera með fyrirbyggjandi aðgerðir í samfélaginu (sem er einnig alveg ofsalega góð hugmynd, þar sem ég er allur fyrir það að aðgengi einstaklinga undir aldri að þessu sé eins óaðgengilegt og hægt er.) þá hækkar lánið þitt. Vísvitandi er ríkið að hækka verð á hlutum (nær árlega ef ekki oftar) sem fer út í hækkun á lánið þitt.

Það má kannski að mörgu leiti samþykka það að almennar nauðsynjavörur fái að vera í þessari meingölluðu verðtryggingu (fyrst við tókum þessa skelfilegu ákvörðun að taka þessa verðtryggingu upp, til að byrja með). En að setja í hana fíkni og ávanabindandi efni sem ríkið er með einokun á og er með yfirlýsta stefnu að hækka álögur á, er eitthvað sem ég hreint og beint get ekki skilið eða gúdderað. Þetta er eitthvað sem þarf að laga og breyta.

 

Strax. Takk!

Íbúðalán hækka um 3-4 milljarða

Loksins maður með viti!

Það var mikið að einhver tók af skarið og lét verða af því að koma upp eðlilegum launahækkunum. Enda eðlilegt í svona mikilvægu starfi.

Átta milljónir eru ekki nema upp í nös á ketti þannig lagað, um tæplega tvöföld árslaun almenns launþega. Bara dropi í hafið við hliðina á því sem bankamenn voru með.

 Núna er að bíða eftir því að við jöfnum öll hin launin í samfélaginu um slíkt hið sama. Flest verkalýðsfélögin sammþykktu höfðinglega hækkun upp á 5-6% á þriggja ára grundvelli. það þýðir að það vantar ekki nema um 72% uppá að við séum komin á sama stað.

Það hjálpar að það sé komin löggjöf um þetta, þannig að þetta hlýtur að vera fordæmisgefandi. Þar sem allt annað virðist vera fordæmisgefandi hingað til. Tel ég að þetta muni hjálpa heimilunum alveg stórlega að fá þetta aukna fjármagn sem svona myndarleg hækkun hefur í för með sér.

Hækkaði stjórnarlaun um 77%

aðeins 10.7 milljaraða?

10.7 milljarðir hljómar nú ekkert svo mikið. Bara rétt slefar yfir töluna tíu.

 

Setjum þetta samt í samhengi sem flestir skilja.

Þú kaupir notaðan bíl í fínu standi á rétt rúma milljón. Tala sem allir skilja.

10.7 milljarðir hljómar ekkert mikið. En það eru 10.700 milljónir. Tíu þúsund og sjöhundruð milljónir.

Einhversstaðar var talað um 60 milljarð króna hagnað bankanna á þessu ári. (eða ársfjórðungi, what ever) það eru 60.000 milljónir. Sextíu þúsund milljónir. Það er næstum því full borgaður notaður bíll á hvert heimili á íslandi. Og þetta var hagnaður þeirra. Samt missum við svolítið af þessu þar sem við sjáum bara töluna 60....

 

 Ég skora á MBL.is að hætta að nota tölur sem skiljast illa og nota milljónir frekar. 

Afskrifuðu 10,7 milljarða

Æðisleg þversögn.

Núna þegar þetta er skrifað er á sama tíma verið að draga úr fjármagni til íþróttamála í nær (ef ekki öllum) öllum sveitafélögum sem ég veit um.

Biðlistar í fimleikasali landsins skipta hundruðum barna í hverjum sal fyrir sig.

Þetta eru staðreyndir.

Á sama tíma og þessar staðreyndir eru á borðinu, eru ráðamenn að tala um að koma upp nefndum til að ráðast á að finna lausnir á þessum málum. Þar sem allir vita að of mikil þyngd er þungur baggi á velferðarkerfið okkar.

Staðreyndin er sú að það er alltaf að fækka möguleikum einstaklinga til íþróttaiðkunar á íslandi. Á svona tímum (þeim harðindum sem er í gangi núna) á að ögra fólki að stunda íþróttir, og auka þær.

Smíða sali fyrir nemendur á biðlistum, opna fyrir niðurgreidd námskeið, ýta fólki í að prufa nýtt athæfi.

Önnur staðreynd í þessu er það að hreyfing ögrar manni í meiri hreyfingu. Á sama hátt er ofát vísir í meira ofát.

Lausnin á þessum vanda er að rífa upp íþróttastarfið. Þetta kemur allt til baka, með iðngjöldum, og verslun tengt þeim varningi sem þarf til iðkunnar á íþróttinni. (skór, föt og svo framvegis).

Salirnir standa undir sig. Nemendurnir eru til staðar. Atvinnulausir iðnaðarmenn eru til staðar til að reisa salina.

Samt er núna næsta skref, að setja á laggirnar nefnd til að líta á þetta mál....

...áfram ísland!

Allt að 180 kíló að þyngd á fæðingardeild

Sviðsstýra...

Hún Ellý var Sviðsstjóri umhverfis og samgöngusviðs Reykjavíkurborgar og er nú borgarritari.

 Ef fólk ætlar að breyta titlum þá er um að gera að breyta þeim öllum.

 Kennari er karlkynsorð, en í grunnskólum eru kvennmenn í yfirgnæfandi meirihluta kennarar. Væri þá ekki ráð að kalla það starf Kennarína eða Kennstýra? 

Hvað með lækni? Virtur starfstitill. Eigum við að breyta honum í læknir og læknína?

Sama gildir um Ráðherra, forseti, dósent eða doktor. Þetta eru titlar. Látið þá vinsamlegast í friði.

Þessi orð koma kynjum ekki við.

 

Takk fyrir.

Ellý ráðin borgarritari

Vinstrikennd rökhugsun.

Þetta er nokkuð skondin grein.

 Sama hvernig ég nálgast þetta þá er þetta mér ofviða að skilja. (enda ekki excel sérfræðingur).

 Samdráttur er á notkun eldsneyti. Við það er hækkaður skatturinn til að mæta fyrri áætluðum tekjum í ríkissjóð.

 Seinast þegar ég vissi þá hagnaðist ríkissjóður meira af því að þurfa ekki að gera eins mikið við götur borgarinnar, eða auka breikkanir/mislæg gatnamót til að mæta aukinni umferð.

 

Annað er það að samdrátturinn er sökum þess að fólk er með minna á milli handanna. Við það keyrir það minna. Það að hækka gjaldið á forsendum þess að fá meira inn í kassann mun í raun orsaka það að fólk keyrir enn minna, og þar af leiðandi fer þessi "aukning" ekki neitt. Það eru yfirgnæfandi líkur að það verður enginn arður af þessu.

 En! Vinstristjórnin tæklar þetta eins og þeim er best trúandi. Að nálgast þann auð sem allir landsmenn hafa enn, enda situr almúginn á gullkálfi og það veit hver einasti vinstri maður.

 

Ég hef í raun eina spurningu handa stjórninni.

 Loks þegar landflóttinn er orðinn það mikill að það er rýrnun á íbúatölum landsins, og boginn yfirspenntur svo harkalega að  þeir sem fastir eru hérna eru allir komnir meira og minna í þrot. Munið þið þá ráðast á félaga ykkar í bönkunum og fjármálastofnunum? 

 Hvenær munum við leyfa okkur að fella þessi öflugu 2% þjóðar sem enn hefur það fínt eftir þetta "góðæri" allt saman? Hvað þarf til að hin 98% fái að lifa lífinu eins og mannverur, en ekki skrimtandi um og betlandi, takandi góðgerðar aðgerðir eins og 110% leiðina eða að taka út séreignarsparnaðinn sinn sem þið svo takið fullan skatt af?

 Það vantar ekki úrræðin til að hjálpa þjóðinni. Þær aðgerðir sem boðnar hafa verið hafa allar falið í sér að skera af sér útlim til að fá sér eitthvað að borða.

Þið sannið enn og aftur að ef það er einhversskonar kreppa á íslandi, þá er það stjórnmálakreppa.

PS. Ein lítil bón til ykkar í stjórn.. Vinsamlegast ekki mæta í vinnuna á mánudaginn.. skaðinn sem skeður er, er það mikill að við höfum ekki efni á að þið gerið meira.. hvað þá framkvæmið eitthvað.

Hækka skatta á bensín

Hvað með allt hitt?

Að bæta aðstöðu hjá boltaíþróttunum er fínt og gott framlag og óska ég þeim til hamingju með það.

 En hvað með allar hinar íþróttirnar?

Þessa stundina eru vel yfir eitt þúsund krakkar á biðlistum í að komast í fimleika.

 Þetta réttlætir byggingu á allavega tveim fimleikasölum í sama stærðarflokki og Gerpla eða Ármann.

Raunin er því miður sú að það er frekar skorið niður af hálfu bæjarfélaga en að bæta og ýta undir  aðrar íþróttir en boltaíþróttirnar. Því miður.

 Arðbærar íþróttagreinar og mikilvæg flóra möguleika er afskipt sökum þess að hún er ekki sýnd almennilega í í sjónvarpi eða fréttamiðlum. Það er merkisviðburður þegar við vinnum eitthvert smáríki í fótbolta, fréttir tala um þetta í tvo daga, sjónvarpið jafnvel endursýnir leikina. En þegar við eigum heimsmeistara í einhverri annari íþrótt, telst það gott að það komi í lítilli hliðarklausu í íþróttaopnunni.

Í dag eru um 350 iðkendur í parkour/freerun. Það hleypur á öðru hundraði biðlistarnir fyrir íþróttina. Íþróttin er ekki með sína eigin aðstöðu, heldur er hún upp á aðrar íþróttir komin til að fá að vera inní sölum og fá afnot af aðbúnaði til að kenna hana.

 Vinsamlegast hugsið um allar íþróttir, ekki bara fót eða handbolta, takk. 

Samþykkja að leggja 10-12 milljónir í áhorfendastúku

Stórglæsilegar fréttir fyrir okkur öll!

Flestir sem ég hef talað við hafa tekið þessari frétt neikvætt. Mér finnst þetta frábærar fréttir.

 Núna loksins er framkvæmd stjórnvalda að skila sér til baka í samfélagið og sá þungi baggi sem við heimilin höfum borið á herðum okkar frá hruni loksins að koma til baka til okkar.

 Þetta margir milljarðar króna frá kaupþingi (ég hélt reyndar að þetta væri Arion Banki núna, en það er annar sálmur) munu vera kærkomin búbót til okkar til að létta á lánum og fasteignaskuldum heimilanna.

 Nú þar sem þessi blessaði hagnaður er kominn á hreint vænti ég þess að okkar duglegu stjórnmálaleiðtogar muni á næstu dögum tilkynna það á þingi að þessi hagnaður verði jafn dreifður meðal almennings til að létta á heimilunum. Skattfrjálst að sjálfsögðu, þar sem þessi peningur er jú eign okkar, plús það að við höfum nú þegar borgað skattinn af þessu öllu saman.

 Með þægilegum slump reikningi ætti þetta að vera um 300.000 krónur á hvern þegn. Hljómar ekki mikið en þetta er á hálfsárs grundvelli, þannig að þetta er um 600.000 krónur á hvert mannsbarn á ári. Þetta er einnig bara einn af þremur aðalbönkum landsins, þannig að með þessum slumpreikningi ætti þetta að skila um 1.8 milljón á hvert mannsbarn á ársgrundvelli. Þessi hagnaður myndi rétta við skuldastöðu heimilanna nokkuð hratt. Það eina sem bankarnir missa er í raun hagnaðurinn af þeim fjármunum sem þeir eiga nú þegar. Við í raun munum ekki taka neitt af þeim, einungis hindra áframhaldandi hagnað.

 Nú bíð ég spenntur eftir þessari jákvæðu tilkynningu frá yfirvöldum.

 Kveðja,

Ég.

Eignir jukust um 100 milljarða